Логотип БилингваБилингваУдмуртский центр билингвизма

Телефон: (8 3412) 687-798

E-mail: udmbilingva@yandex.ru
Контактная информация

Познавательные рассказы Ивана Степановича Михеева


Шырчик (Сьӧд юбер)

Тулыс вуэ. Тани лымшор палысен тылобурдоос вуыны кутско. Азьло ик шырчикъёс вуо. Уно ӵошен лыктыса соос вань гурт кузя вӧлдӥсько, каждоез аслэсьтыз карзэ утча. Ӧжыт гинэ шутэтскизы ке, ваньзы сямен бусые, возь вылэ, ву дуре лобӟыса сиён утчаны кутско. Соос сиён утчаса вань нуналэз сӥзьылозь ортчыто. Гырись гырыса ветлэ, гырись сьӧры шырчик нумыр бичаса ветлэ. Турнась турын турна, шырчик со сьӧры ӟозъёс кутыса ветлэ. Адями пудо возьма, шырчик пудолэн тыбыр вылаз пукыса гон пушкын бугыръяське.

Со сямен шырчик уно бозъёсыз, нумыръёсыз, кутъёсыз но мукет уно изъян ваись макеосыз сиыса муртлы уно пайда вае. Ю кизись мурт солэсь вань пайдазэ валам бере шырчиклы чебер корка лэсьтыны но ӧй жалясал.


Ӟольгыри

Ӟольгыриез уг ушъяло, сое дась сиись, вор шуо. Солэсь лушкаськемзэ котькин но адӟе, кызьы улэмзэ, муртлы мар пайда ваемзэ ӧжыт мурт тодэ. Тулыс вуэмлы адями кадь ик ӟольгыри шумпотэ. Зольгыри аслыз эш (юлтош) шедьтыса соин валче кар лэсьтыны кутске. Пӧсьтэм кышет октӥсь бигер кадь ик со турынэз, куроез, гонэз, ыжгонэз кар лэсьтыны нуллэ. Карзэ со я укно йылэ, я карниз сьӧры, я куштӥськем шырчик кар пушкы, я писпу гырке лэсьтэ. Кар лэсьтэм бераз со пушкы со вить-куать пуза. Пузам бераз соос вылэ пуксьыса уин-нуналэн пи поттэ.

Нюлэськысь писпуос куарен шобырскыны кутскон дыръя ӟольгырилэн пиосыз потыса вуо. Лобамез луымтэ пиосызлэн туж сиемзы потэ. Анаез лумбыт дугдылытэк соослы сиён утчаса лобаса ветлэ.

Гидкуазьысь, урамысь, бусыысь со нумыръёс бичаса ветлэ. Пичи пиослэн ю тысез сиемзы уг лу. Со сямен кык-куинь арня мында соосыз сюдоно луэ. Туж уно, олоокӧня сюрс нумыръёсыз быдтэ со куспын одӥг ӟольгыри.

Куинь арня ортчем бере, ӟольгыри пиос бурдъясько, карысьтызы лобӟыса кошко. Собере пересь ӟольгыриос кар пушсэс выльдыса нош ик пи потто, соосыз нош азьло сямен ик сюдыса будэто.

Тулысысен сӥзьыл вуытозь ӟольгыриос пиоссэс нумыръёсын сюдо. Уно писпу емышъёс, бакча емышъёс ӟольгырилэн ӟеченыз гинэ будыса-кисьмаса вуо. Ӟольгырилы тау карыны кулэ. Ӟольгыри дась сиись ӧвӧл, со садэз-бакчаез возьма.

Гужем ортчон дыръя ӟольгыри но ваньме. Пи вордонлэсь мозмыса со ю-тысь борды кутске. Со пыш вылын, сюрес дурын, иньшырын (икемын) лобаса ветлыны кутске. Гужембыт муртлы юрттэмез понна ӟольгырилы одӥг-кык кырым ю-тысез жаляны уг яра. Со унозэ буш быроно кисьтаськем тысез бича. Толалтэ вуиз ке, лысыусьыса вань музъемез шобыртэ. Ӟольгыри сиёнлы ёрмыны кутске. Куштэм жаг пушкын ӵабъяськыса, сюрес кузя ветлыса, озьы но тазьы сютэм кулон шедьтэ. Тол шорын бадӟым кезьытъёс луон дыръя тужу но ӟольгыриос кынмыса быро. Адями пуныез, коӵышез сюдэ, ваёбыжез но дыдыкез яратэ. Ӟольгыриез жалясь туж ӧжыт.


Ваёбыж (пӧськы) куазь зоронэз тодытэ

Зороно пилем лыктон азьын со пилем бордысен куазь мускыт луыса олокӧня сю иськеме вӧлдӥське. Пилемез адӟонтэм дыръя ик куазьлэн мускытэз шӧдӥське ини. Со мускытэз векчи лобаса ветлӥсь лыдтэм макеос шӧдо. Со мускытэн соослэн бурдъёссы мускытомыса секыт луо, вылын лобаны эрик уг сёто. Соку кузь кукъёс, чибиньёс, музъем вылтӥ гинэ лобаны кутско.

Куазь кӧс дыръя лыдтэм макеос вылэтӥ лобало. Соос сьӧры вылэтӥ лобаса ветлэ ваёбыж но.

Озьы тӥнӥ ваёбыжлэн лобаменыз куазь зорнэз-зоронтэмез тодыны луоно.


Камыш тылобурдо

Ву дурын улӥсь одӥг тылобурдо вань. Ӟуч сямен сое камышовка шуо. Со аслыз карзэ камыш пушкын лэсьтэ. Карзэ турын ньӧрлэсь пуныса, ӝуез, скал гонэз вӧлдыса небыт каре. Камыш пушкын турын кузя ветлӥсь лыдтэм макеос солы сиёнлы ярало.

Июнь толэзьын со пузаны кутске. Пукыны кетскем бераз пиосыз потытэк уг вырӟы ини камышовка. Сюэз куасьмыкуз гинэ со чаляк ву доры тэтче. Ву юон дыръяз мумыез интые айыез пуке. Айыез мумызэ туж яратэ. Мумыез пукон дыръя со кырӟа. Ӝытлы быдэ камышовка вань интыысь ву дурысен солэсь чебер кырӟамзэ кылыны луоно.

Кык арня ортчем бере камышовкалэн пиосыз пото. Соос азьло гонтэм луо. Зор, тӧл вырӟон дыръя соосыз пузкарзы возьма. Ву будон дыръяз но пузкар доры уг вуы, со камыш бордын вылын луэ. Тӧл луиз ке, пузкар ӟечыраны кутске. Пузкар мур луэ, пиосыз отысь угу сё. Куазь зорон дыръя камыш вуэз пузкаре пырыны уг лэзьы.

Июль толэзьын камышовкалэн пиосыз пузкарысьтызы пото. Соослэн азьло кыдёке лобамзы уг луы. Соос камыш вылысен камыш вылэ гинэ лобаса ветло. Сӥзьыл кезьыт тӧлъёс вуон дыръя соос кыдёке лобаны но дышыса вуо. Вань эшъёсынызы люкаськыса соос толалтэлы лымшор пала шуныт азе лобыса кошко.


Тӧдьы душес

Тӧдьы душеслэн нырыз но гижыосыз йылсо луо. Бурдъёсыз паськытэсь, соин солэн лобамез но секыт луэ, со улытӥ гинэ лоба, пичи тылобурдоос сьӧры вутскемез луоно ӧвӧл.

Тӧдьы душес азьтэм, кышкась луэ. Аслыз сиён витьыса, шырез, комакез возьмаса со одӥг пу вылын я одӥг из вылын вырӟытэк туж кема сылэ. Со витем интыяз ӧз ке шедьты, со каллен гинэ лобӟыса, шып гинэ мукет азе пуксе но отын возьманы кутске. Аслыз кулэ макеез адӟиз ке, со тӧл кадь ик кужмысь вырӟыса нырыныз кокча но отын ик сие. Тӧдьы душес толалтэ куазен аслыз сиёнлы шыръёсыз утча. Одӥг ар ӵоже со олокӧня сюрс шырез, комакез кутэ, дыр, чоттэм уно лыдтэм макеосыз быдтэ. Сыӵе улэменыз тӧдьы душес адямилы тужу но пайда вае.