Логотип БилингваБилингваУдмуртский центр билингвизма

Телефон: (8 3412) 687-798

E-mail: udmbilingva@yandex.ru
Контактная информация

Познавательные рассказы Кузебая Герда


Ваёбыжъёс

Ваёбыжъёслэн пичиесь гинэ пиоссы потӥллям: соос нуналлумбыт сюлмасько, лобало, кесясько. Нуналлумбыт бубылиос, нымыос, кибыос сьӧры лобало, соосыз кутыло, каразы нуыса, пиоссэс сюдыло.

Карзы соослэн туж вылэ, корка липет борды ик лэсьтэмын. Сое ваёбыжъёс нӧдэз (дэриез) нуллыса, сюез лэсьтӥзы, пушсэ небыт мамыкен вализы: пиналъёссылы отын улыны шуныт.

Соослэн нылпизы нуналлумбыт отын рад-рад пуко, ваче верасько, сиён возьмало, ӵуж ымдуро ныръёссэс поттыло. Муми-аизы соос доры лобӟыса лыкто но, усьтэм ымазы нумыр-кибыли донгыса кельто. Ваёбыжпиос черодэн-черодэн ымзэс усьяло, ваньмызлы сиён мед сюроз шуыса. Ваёбыжъёс кыдёке лобӟыса кошко но, телеграм ез вылэ пуксьыса:

«Чекоты-вокоты,

Чекоты-вокоты

тир-тир-тир, ви-и-ть!..»

шуыса, кырӟаны кутско.

Озьы кырӟамзэс кылыса, пиналъёссы карысьтызы йырзэс поттыса, ымъёссэс паськытэсь усьтыса дасясько.

Нуналысь-нуналэ озьы соос будо. Тани, соослэн бурдъёссы но бадӟымесь луизы ини. Одӥг арня улыса, соос карысьтызы лобӟозы ини. Ӧжыт лобаса, сӥзьыл вуэм бере, туж кыдёке шуныт шундыё шаеръёсы лобӟыса кошкозы.


Уин ужасьёс

Шунды пуксён палаз берытскиз. Тылобурдо кырӟам куара чалмытске. Котькин нуназе пӧсьын жадем бераз шутэтскыны турттэ.

Шунды пуксиз, куазь ӝомыт луиз. Нуназе лобаса ветлӥсь бубылиос но, кутъёс но пегӟизы. Кырӟась тылобурдоос куар пушкы пырыса, кӧлыны пуксизы. Соосыз кутылӥсь душес но караз кошкиз. Озьы но нюлэскын уж уг дугды али. Лушкем интыосысь, югыт йӧтымтэ интыосысь уин ужасьёс потӥзы. Соос югытэз уг ярато: югытэн соослэн синзы мальдэ, уг адӟы, ‒ ӝомытэн но уин гинэ умой адӟо. Соин соос нуназе лумбыт пеймыт интыын изьыса кыллё. Уй вуэм бере гинэ кӧтсэс тырыны пото.

Уин соос сиён туж уно шедьто: соку бубылиос, кибылиос тужу но луо. Со бубылиос, кибылиос ‒ ваньзы нюлэслы изъян ваись макеос.

Бадӟым ымзэ усьтыса вужерак-вужерак урткыӵ лоба. Ёросысьтыз бубылиосыз огзэ но уг кельты, ымыз жадьымон сие.

Нюлэслы изъян ваисьёсыз сиыны со сяна бадӟым-син кучыран, пелё ыгы пото. Нюлэслы, юлы, бакчалы изъянтӥсьёсыз быдтыны турттыса, соос уйбыт ужало. Только адями соосыз уг яраты: соослэн гонзы мотор уг луы, кырӟамзы уг луы, пайда ваемзэс тодӥсь ӧвӧл. Кучыран гуртын чиректӥз ке, ‒ оломар урод адӟон луоз шуыса кышкало. Соин куддыръя со пайда ваись тылобурдоосыз чик жалятэк виыса но кушто.