Логотип БилингваБилингваУдмуртский центр билингвизма

Телефон: (8 3412) 687-798

E-mail: udmbilingva@yandex.ru
Контактная информация

Рассказы Виктора Васильевича Туганаева о деревьях и кустарниках

Рассказы взяты из книги: Туганаев В.В. Коля тодэ 50 будэсэз, нош тон?..: Веросъёс / В.В. Туганаев. ‒ Ижевск: Удмуртия, 1988. ‒ С. 3-11


ТОДМАТСКЕ КОЛЯЕН

Туэ Колялы куать арес тырмиз. Улэ со гуртын. Анаез ‒ скал кыскись луыса ужа, атаез ‒ тракторист. Коляез ӵемгес песянаеныз артэ адӟыны луэ. Песянайзэ гуртын Марпапай шуо. Лякыт сямо Марпапай яратоно внучокезлэн пумтэм юанъёсызлы валэктэ, солэсь ужаны мылкыдзэ жутэ. Вань пиналъёс пӧлысь Коля тужгес но эшъяське Валентинэн. Соос ярато инкуазез, пудо-животъёсты, шудо пӧртэм шудонъёсын.

Коля ӵукна одӥг дыре иземысь султэ, валессэ ачиз ик тупатэ, анай-атаеныз, песянаеныз ӟечбуръяське. Уг вунэты зарядка но лэсьтыны, собере пылаське, пиньёссэ сузя. Ӝӧк сьӧрын пукыкуз уг дырты, нош сиськем бераз тусьты-пуньызэ ачиз ик пӧсь вуын гылтэ. Со котьку чылкыт дӥсяськемын. Колялы ваньмыз тунсыко потэ: мар со кизилиос, шунды, кытын но кызьы кылдо пилемъёс, малы тол бере тулыс вуэ, кытын толъё тросэз тылобурдоос, вань-а нымы-кибыослэн йырвизьзы, кытын, кыӵе калык улэ, трос-а удмуртъёс дунне вылын?

Тодэмез потэ солэн будосъёс сярысь но. Яратэ песянаеныз но Валентинэн ӵош нюлэсъёстӥ, возь вылъёстӥ яке шур кузя ветлыны.

Та пияш мыным туж кельше будосъёсты тодыны тыршеменыз, соосты яратэменыз. Мон юри лыдӟи: Коля тодэ ог 50 будосъёсты. Куать аресъем пилы ӧжыт ӧвӧл со. Соин но, вылды, тӥлесьтыд, пинал лыдӟисьёслэсь, юаме потӥз ‒ нош тӥ кӧня будосъёсты тодӥськоды?


Ель Кыз

Гурт пумын кыз будэ. Матысен солэн йылаз учкиськод ке, йырысьтыд картузэд ик усе, ява, ‒ сокем ӝужыт со.

‒ Песянай, кӧня арес та кызлы? ‒ юаз Коля.

‒ Мон пинал дыръям татын нюлэс вал ай. Кызьы меда та кыз огназ кылем, уг тодӥськы. Укыр веськрес, чебер вал, дыр, соин нюлэс корасьёс жалязы, луоз, мискинез. Мынам чотамея, солы али ог 100 арес.

Кызлэн вайёсыз тӧл шонамъя мӧзмыт, огпӧртэм гурен шаугето. Кыӵе гинэ шуг-секытэз ӧз адӟы со даур ӵоже? Тӥни со сярысь вера, вылды, туннэ кыз аслаз кырӟаназ.

Кызлы но, адямилы сямен ик, эш кулэ вылэм.


Пужым

Пужымез котькин яратэ. Сюсьтыл кадь со вольыт, ӝужыт но веськрес мугоро, баблес йылыныз инме ик сузьтӥське. Куазь тӧло дыръя пужымъёс ог-огенызы ӵашетыса верасько.

Пужым туж яратэ луо выл музъемез. Татын со ассэ кузё кадь возе, мукет писпуослы аляны эрик ук сёты. Нош горд сюй вылын пужымлы будыны кыз яке музон писпуос люкето.

Пужымез шедьтыны луэ на нюр интыысь но. Уноез писпуос отын будыны курадӟо, нош пужым таӵе начар музъемын но удалтэ.

Пинал пужымлэн вайёсыз котькуд аре, одӥг выжыысь потыса, ӝажы выллем липет кылдыто. Та липетъёсты лыдъяса, тодыны луэ пужымлэсь арлыдзэ. Тани Коляен Валентин шедьтӥзы куать аресъем пужымез. Писпу соослэсь ӝужыт будэм. Озьыен, адямиос писпуослэсь калленгес будо?

Пужымлэсь корка но юртъер котыр лэсьто. Юр-сирез но солэн бадӟым пайда сётэ. Пучыоссэ гинэ но бичало, соослэсь эмъюм потто. Нош пужым пуэн эстэм коркан кыӵе шуныт луэ! Пужымо нюлэскын омыр котьку чылкыт, югыт.


Ньылпу

Колялэн атаез Выль ар азьын кыз интые ньылпуэз ваиз. Сулэз солэн пурысь, лысъёсыз кызлэн сярысь пеймытэсьгес, нош зыныз сыӵе ик ческыт. Ньылпуэн ӵош корка пушкы нюлэс омыр пыриз кадь. Коля песянаеныз ньылпуэз чеберъяз, йылаз горд кизили юнматӥз. Чебермам ньылпу шоры учкиз но, шӧдтэк шорысь юаз:

‒ Песянай, малы ньылпулэн кускылиосыз ӧвӧл, нош кызлэн вань?

‒ Ньылпулэн но кускылиосыз луо, пие, но соос пырдыса туж чаляк тӧлзо. Нош кыз кускылиослэн сьӧмъёссы юнэсь. Котькуд сьӧмын тысьёс кылдо. Соос куасьмыса кускылиослэсь люкисько но, тӧлъя бергаса-бергаса, палэнэ кошко.

‒ Нош малы Семон кускылиез ӵыжин шуэ?

‒ Со Глазов палась, отын кускылиез озьы нимало, пие.


Кызьпу

Уин шуак ӝутскем тӧл усьтэм укноез шалькак! ворсаз. Коля куалектыса сайказ но песянаезлэсь юаз:

‒ Map ке усиз шат?

‒ Изь, изь, пие, номыр ӧз усьы, укно со озьы ворсаськиз. Куазь зорыны турттэ.

Озьы ик луиз. Нырысь тӧл ортчыт зол куашетӥз писпу куаръёс пӧлын, нош собере гудыръяса но чилекъяса зор вуиз. Коля, валес вылысьтыз васькыса, укно доры лыктӥз. Укно доразы ик кызьпу будэ. Чилекъяку солэн вайёсыз но куаръёсыз умой адӟисько. Колялы со туж жаль потӥз. Оз но шӧды бӧрдыны кутскемзэ.

‒ Map луиз, Коля? ‒ сюлэмшугъяськыны кутскиз песянаез.

‒ Кызьпу жаль, ‒ викышъяса валэктэ Коля, солы кӧшкемыт но кезьыт ук!

‒ Э-э-э, пие, пие, ‒ буйгатӥз сое песянаез, ‒ со шумпотэ гужем зорлы. Зорву сое миськоз, тузонзэ гылтоз, кызьпу выжыеныз кот музъемысь кӧня кулэ сомында вуэз басьтоз. Ӵукна чакла ай, кыӵе умой мылкыдын пумиталоз со тонэ!

Ӵукна сайкамез бере ик, Коля бызьыса потӥз ураме. Шунды яркыт пиштэ, ӟольгыриос бӧтьырто, куакаос кытчы ке но бадӟым уллёен лобо. Гуждор вож-вож луэм, чылкак выльмем кадь. Кызьпу чылкыт мисьтӥськем, сулъёсыз юг-юг тӧдьыесь, куаръёсыз шундыя ворекъяло но чиляло, гурыосыз, шумпотыса выллем, капчи тӧлъя лэйкало. Коля валаз, зор ваньмызлы кулэ шуыса: тылобурдоослы но, гуждорлы но, писпуослы но.


Бадьпуос

Вазь тулыс майсы сайказ но соку ик лобӟиз сиён утчаны. Нош та вакытэ бакакуарлэн но бадьпулэн гинэ сяськаоссы усьтӥськемын луо. Отысь майсыос асьсэлы сюрел но мӧль басьто, соослэсь чечы но сюсь кылдыто. Чечыен соос нылпиоссэс сюдо, нош сюсьлэсь кӧкы выллем гырк лэсьто. Кӧкыосын будо пинал майсыос. Нырысь пал соос нумырлы кельшо, берлогес ини зарни лулоослы пӧрмо.

Коля майсыосыз адӟыса шумпотэ но бадьпулы тау каре: бадьпу ке ӧй луысал, маин кӧтсэ тырысал майсы?

Асьме шаерын пӧртэм бадьпуос будо: горд, тӧдьы, сьӧд суло но мукетъёсыз. Ваньзы соос кот музъемез ярато, соин ик бадьпуосты ӵемгес пумитано ярдуръёсын, нюръёсын но нёжалъёсын.

Коля тодэ кык пӧртэм бадьпуосты: кӧсэз яратӥсьсэ ‒ со вазь тулыс ӝужа, кӧс интыосын будэ, калыкын сое уйпу нимало. Нош тодьы бадьпу вань бадьпуос пӧлысь ӝужытгес, кыз ӝужда будэ. Модосэз ӵем дыръя зӧк луэ, ваче ки кутӥськыса но мырдэм ӟыгыртыны сузёно.


Пипу

‒ Малы пипу писъёсты нимаз артанае тыриськод? ‒ Колялэсь юаз песянаез.

‒ Ма, ачид верад вал ук, пипу ӝуакуз уг ӵынды шуыса. Соин ик пипу писъёсты нимаз тырисько, ‒ валэктӥз Коля.

Коля пипуэз умой тодма, со сярысь оломар но тодэ. Та будос кызьпуо но кызо нюлэсэз яратэ. Куд-ог интыосын пипу нюлэс кылдытэ. Пипулэн вайёсыз укыр кузесь но векчиесь, соин ик куаръёсыз тӧлтэм дыръя но куалекъяло.

Кос пипу зэмзэ но ӧжыт ӵындэ, соин ик солэсь шырпу лэсьто. Учке ай шырпулэсь чагзэ ‒ со пипулэсь вандэмын. Эшшо пипулэсь лэсьто на усто куасъёс. Султӥськод соос вылэ ‒ васькыто ук гурезь уллань! Нош валъёс но скалъёс тужгес но ярато пипулэсь жалем куаръёссэ сыскыны, небыт вайёссэ йырйыны. Койыклы но соос кельшо. Луд кечъёс но гажало пипуэз ‒ солэсь сулзэ йыръё.


Тополь

«Котьмар ласянь та писпу кельшымон: чебер, ӝог будэ, мамыкеныз гинэ шат нерад каре, укноез ик усьтыны соин йырин уг луы»,‒ тополь сярысь бускелезлы вера Марпапай.

Колялы нош тополь кельше. Май праздник азьын садикын огпол солэсь вайёссэ вуэн вазае пуктӥзы но, ог арня ортчыса, вайёс чебер, ненег куаръёсын шобырскизы. Собере пиналъёс тодьы кагазлэсь сяськаос йӧндыризы но соосты тополь вайёсы юнматӥзы. Вож-вож куаръёсын но тӧдьы сяськаосын вайёс туж чебер луизы.

Таӵе чебермам арбериосын пиналъёс сцена вылын концерт возьматӥзы. Коля май сярысь кылбур лыдӟиз, кияз топольлэсь вайзэ кутыса.


Сирпу но нюлопу

Вырйылын, Колялэн коркаез дорысен кыдёкын ик ӧвӧл, сирпу будэ. Ӝытъёсы со доры егитъёс люкаськыло. Вазь тулысысен бер сӥзьылозь гурезь бамалын чебер кырӟанъёс чузъясько.

Колялы песянаез мадиз, со сирпуэз, пе, Катьырнапай ог 70 ар талэсь азьло мерттэм. Вӧзысьтыз будосъёс куасьмыса быриллям ни. Огназ кылем сирпу тулыслы быдэ паськыт куаръёсын шобырске, нош сӥзьылпал уно сюрс кидыс кылдытэ.

Тысьёсыз туж паймымонэсь ‒ кагазлэсь лэсьтэмын, кожалод. Тӧл соосты капчиен кыдёке пельтэ. Тани Колялэн бакча бераз но тысьёслэсь куинь сирпуос будо.

Огпол Коля нюлэскысь сирпу выллем писпуэз адӟиз.

‒ Map та, песянай, сирпулы кельше но, уг но кадь?

‒ Нюлопу та, пие, сирпулэн ӵыжы-выжыез. Куаръёссэс ӵошаты ай, соку валалод соослэсь пӧртэмлыксэс. Сирпулэн куарез гонтэм, гольык, нюлопулэн ‒ улласянь небыт гонэн шобырскемын.

‒ Нош будосъёслэн модоссы маин огкадь но маин пӧртэмгес? ‒ юаз котьмае тодыны тыршись пияш.

‒ Огкадез со гинэ: кыкез но нӧзь луо, уг тӥясько, куасалско. Сирпулэсь азьло буко куасаллязы, дӧдьы лэсьтылӥзы, нюлолэсь ‒ куас, курезлэсь ‒ куды, кӧкы но коскы.

Коля нюлопулэсь кӧня ке куаръёссэ дораз нуиз но сирпу куаръёсын ӵош книга бамъёс вискын куасьтӥз. Табере со умой тодма ини сирпуэз но, нюлопуэз но.

Ӟуч сямен сирпуэз «вяз» шуо, нюлопуэз ‒ «ильм».


Лулпу

Атабай нюк кузя арама кыстӥське. Лулпу сяна, татын льӧмпу но сьӧд сутэр будэ. Нош куд-ог кушъёсын боры но вань. Коля песянаеныз та арамае ӵем вуылэ. Тулыс татысь соос чырс турын окто, нош гужем лянэссэс сутэрен, борыен я льӧмен тырмытыса берто. Огпол Коля песянаезлэсь юаз:

‒ Малы лулпулэсь мульызэ сиыны уг яра, куаръёсыз но ческытэсь ӧвӧл... Озьы бере, малы кулэ со?

Песянаез внучокезлы валэктӥз, асьме палан кык пӧртэм лулпуос пумиськыло шуыса. Одӥгезлэн сулэз пурысё-тӧдьы, сое тӧдьы лулпу шуо, мукетызлэн пурысё-сьӧд, тазэ сьӧд лулпу нимало.

Тӧдьы лулпуэз Коля тодэ ини, нош сьӧдзэ ӧз адӟы на. Песянаез валэктӥз: сьӧдэз, пе, асьме палан ӧжыт будэ. Нош лулпу инкуазьлы но, адямилы но пайда вае ‒ со музъемез умоятэ. Лулпу будэм бервылын ю-нянь тужгес умой удалтэ.

‒ Озьы ке, лулпу арамаосты кораса быдтыны умойгес уз лу-а? ‒ юатэк ӧз кыльы Коля.

‒ Лулпу арамаосты корам ке, вань пичи шуръёс куасьмозы, пие. Сӥзлань шурмы выллем. Котырысьтыз бадӟым арамаез коразы но, шурлэн пытьыез ик быриз. Табере ачид малпаськы ‒ кулэ-а лулпуосты кораса быдтыны?

Коля жалясь синъёсын учкиз лулпу арама шоры.


Палэзьпу

Ӵукна укыр кезьыт вал, соин ик Коляез садике ӧз нуэ. Нош нуназе шунды потӥз но куазь шунытгес кариськиз. Коля, пичи дӧдьызэ кутыса, Валентин доры вамыштӥз. Ураме гинэ потӥз но, син азяз чебер суред пуксиз ‒ палэзьпу вылэ горд гадё шушыос пуксиллям но дыртыса мульыоссэ кокчало. Тӥни малы палэзьпулэсь вань емышсэ песянаез бичаны ӧз лэзьы. Кельтомы, шуиз со, тылобурдоослы но. Сиёнзы ке вань, соос кезьытлы уг сётско.

Тол ортчиз ке, палэзь нош ик шобырскоз чильтэро куаръёсын, ческыт зыно сяськаосын. Собере вож емышъёссы быгыльскозы, сӥзьыл пал соос горд-горд кисьмалозы.

Шуръёсын ву кынмытозь, палэзь чырс луэ, нош кынтылэм бере, со конял шӧмъем луэ.


Льӧмпу

Аркаш ‒ Колялэн бускелез. Аркашъёслэн корказы бадӟым, корт липето, гидъёссы шиферен, мунчозы пулэн шобыртэмын. Юртъерзы сандык кадь юн но ӝикыт. Огез гинэ алама ‒ юрт котыразы одӥг писпу но уг буды.

Аркаш шуэ, писпуос, пе, бакча емышлы будыны люкето. Нош Коля соин соглаш ӧвӧл. Соослэн корка котыразы кыӵе гинэ писпуос но куакъёс уг будо. Озьы ке но, бакча емышъёс котькуд аре умой удалто.

Коля Аркашлы льӧмпу мерттыны дэмлаз. Вазь тулыс со сяськаяське. Соку ӝыт-ӵукнаосы льӧмпуын уӵыос шулдыр кырӟало, нош гужем пумын ческыт емышъёсыз кисьмало. Песянаез Колялы льӧмен пирог пыже, нош куасьтэм льӧмлэсь кисаль пӧзьтэ. Куасьтэм льӧм куд-ог кӧт висёнъёсты но ӥӧнатыны юрттэ. Льӧмез, адямиос гинэ ӧвӧл, сялаос, дукъяос но, пурысь юберъёс но ярато.

«Льӧмпу ‒ со туж пайдаё писпу, нош Аркаш та дырозь ӧз на мертты сое корка дораз»,‒ пайме Коля.


Улмопу

Улмопулэсь пайдазэ котькин тодэ. Май толэзе солэн сяськаосыз ӝужало но, сад иземысь сайка кадь. Мушъёс сяськаослы шумпото но соос вылысь мӧль бичало. Сӥзьыл улмопулэн вайёсыз секыт емышъёсты мырдэм возё. Соку Коля корзинаен садэ потэ но мыло-кыдо бича картофкалэсь но бадӟымгес улмоосты. Песянаез соосты пеймыт, кӧс но шуныт интые ватэ. Отын улмоос кисьмало но ческыт луо.


Шупу

Огпол Коля телевизор пыр шупу сярысь передачаез кылзӥз. Очкиен пиосмурт тодматӥз та будосэн. Экран пыр шупуэз но возьматӥзы. Лопыр-лопыр куаро со, быдэсак тӧдьы сяськаен шобырскемын. Собере возьматӥзы емышен шобырскем шупуосты. Мульыосыз пичи зонт выллем ӟуски кылдыто.

Шу ческыт луэ куазь кынтылыны кутскем бере гинэ.

‒ Песянай, ‒ передача бере вазиз Коля, ‒ нош малы асьмелэн бакчаямы шупу уг буды?

‒Туймы кузя арамаосын со трос будэ, соин ик ум мерттӥське, пие.

‒ Отын льӧмпу но трос будэ ук, озьы ке но, асьмелэн тӥни кӧня льӧмпумы!

Песянаез мар вераны ӟудӥз но кӧня ке малпаськыса шуиз : ‒Я, я, туэ сӥзьыл мерттомы бакча берамы.

‒Малы отчы? Корка азе мерттом.

‒ Отын буш интыез ӧвӧл ни, пие, нош бакча берын шупу туж чебер адӟиськоз. Шупу туж пайдаё писпу. Песятаед азьло солэсь кортӵог лэсьтэ вал, сапегъёслэсь но катаослэсь пыдулъёссэс соин юнматъялляз.

‒ Кызьы озьы? Пу кортчог луэ шат?

‒ Луэ угось. Шупулэн пуэз кортӵог кадь юн.

‒ Нош шу мульыос пирог пыжыны но кисаль пӧзьтыны сяна марлы ке ярало на-а, песянай?

‒ Соослэсь эмъюм дасяло. Шу мульыосын уно витаминъёсыз но.

‒ Чалякгес сӥзьыл мед вуысал! ‒ чидатэк вазиз Коля.


Крыжовник

Крыжовниклэсь кисьмам мульызэ басьтыкуз, Коля венен бышкалтӥськиз.

‒ Уть тон куртчылӥськись вылэмед! ‒ кизэ крыжовник бордысь чаляк палэнтӥз Коля.

‒ Кинэн тон вераськиськод, Коля? ‒ юаз песянаез.

‒ Крыжовник бышкалляське! ‒ ӝожтӥськиз пияш.

‒ Солэн веньёсыз ӧй луысалзы ке, крыжовниклэсь мульыоссэ нымы-кибыос, тылобурдоос но шыръёс копак сиыса быдтысалзы, ‒ крыжовник пала дурбасьтӥз песянаез.

«Молодец тон, крыжовник! ‒ ас понназ ушъяз сое Коля.‒ Сямыд тынад юн, кышкасьтэм!»

Кӧня ке улыса, пияш быдэс тэркы крыжовник бичаз. Песянаез солэсь варенье пӧзьтӥз.


Эмезь

Сайкем нюлэс интыез котьку сямен эмезьпуос аляло. Татын соос умой будо: модосъёссы зӧкесь, куаръёссы бадӟымесь, емышъёссы ӵыж-горд, пӧлы быдӟаесь луо.

Туэ Коля эмезяны ӧз ветлы на. Песянаез бакча беразы но эмезьпуос мерттэм. Нош Колялы кыр эмезь бакчаысезлэсь ческытгес потэ. Тани туннэ но анаез нюлэскысь ведра тыр эмезь ваем.

Песянаез Коля азе сое быдэс тэркы пуктӥз но кружкаен йӧл сётӥз. Кыӵе ческыт потыса сииз сое пияш.


Сьӧд эмезь

Та нуналэз Коля кема возьмаз. Ӟардон азьын ик песянаез сое сайкатӥз:

‒ Пие, султы, тонэ витё ини!

Колялэн уммез соку ик тӧлзиз кадь. Кӧня ке минут ортчыса, со мотоцикллэн кӧкыяз пуке вал ини. Йыраз каска изьыямын.

Песянаезлы «ӟеч лу!» шуыса гинэ вуиз Коля, соос куиньназы ӝог ширтӥзы Кам шур пала. Отын гурезьёс ӝужытэсь, вырйылысен котыр вӧл-вӧл адӟиське.

‒ Ой, макем чебер татын! ‒ паймиз Коля.

Нюлэс доры вуыса, ваньзы ик мотоциклысь васькизы.

‒ Татысен кыдёкын ик ӧвӧл, сьӧд эмезё инты вань, ‒ шуиз атаез.

‒ Сьӧд эмезь? ‒ Колялэн солэсь емышсэ сиемез вань ни, нош кытын но кызьы будэ со, уг тоды на.

Анай-атаез быдэн ведра басьтӥзы, нош Колялы лянэс сётӥзы.

Тани соос вуизы кыӵе ке куакъёс доры. Соослэн куд-ог модосъёссы музъем вылтӥ нюжтӥсько, мукетъёсыз бадӟым изъёс вылэ кыстӥсько, куинетӥосыз векчи писпуос котыре бинялтӥськиллям.

Шӧдтэк шорысь Коля адӟиз эмезьлы кельшись емышъёсты.

‒ Сьӧд эмезь, ‒ тодмаз со. ‒ Атай, анай! Сьӧд эмезь!

Нуназе пал соос доразы вал ини. Колялэн мылкыдыз туннэ шулдыр. Песянаезлы вераз Камлэн пасьталаез но чеберез сярысь, ӝужыт гурезьёс, пӧртэм сяськаос, бубылиос сярысь. Пияшлэн ымдуръёсыз лыз-лызэсь. Сьӧд эмезез сиыку озьы луэ угось.


Сьӧд но горд сутэръёс

Огпол Коля арамаысь сутэрпу шедьтӥз. Ма, садазы кадь ик, солэн емышъёсыз но вань.

‒ Песянай, кин ке но татчы сутэрпу мерттэм! ‒ вераз со песянаезлы.

‒ Кыр сутэр со, пие. Льӧмпу но, палэзьпу сямен ик, кыр интыосын будэ. Азьло сутэрез садъёсын уг будэто вал, нош табере со котькудӥзлэн бакчаяз вань.

‒ Горд сутэр нош нюлэскын будэ-а?

‒ Малы бен уз буды, будэ. Горд сутэр кот арамаосыз но нёжалъёсыз яратэ.

‒ Песянай, асьмелэн садамы кыкез ик сутэрпуосмы вань, соин ик кырысьёссэ тылобурдоослы кельтомы, ява. Соослэн но ческыт сутэр мульыосты сиемзы потэ, луоз.