Логотип БилингваБилингваУдмуртский центр билингвизма

Телефон: (8 3412) 687-798

E-mail: udmbilingva@yandex.ru
Контактная информация

Рассказы Виктора Васильевича Туганаева об обитателях лесов

Рассказы взяты из книги: Туганаев В.В. Нош ик Коля сярысь: Веросъёс. ‒ Ижевск: Удмуртия, 1993


ПӦЙШУРЪЁС НО МУКЕТ ЛЫСЬӦМООС


ӞИЧЫ

Коляен ӵош одӥг классын Натӥ дышетске. Кескич сямо, ӵыж-горд йырсиез, фамилиез Лисина. Чылкак ӟичы но ӟичы, соин ик ваньмыз сое Ӟичы гинэ шуо. Натӥ та нимлы дышем ини, уг йыркуръяськы. Колялэн зэмос ӟичыез адӟемез потэ, та дырӧзь соин пумиськыны ӧз кылды на. Дядяез огпол вераз, толалтэ, пе, ӟичыез ӵем адӟылӥськом, со кезьыт нуналъёсы гурт котыре вуэ.

Нош толон таӵе учыр луиз. Коляен Валентин эшъёсынызы нискылало вал гурт сьӧрысь гурезьын. Шӧдтэк шорысь одӥгез токолёк вазиз: «Учке ай ‒ ӟичы, ӟичы!» Пиналъёс нискыламысь ик дугдӥзы. Чебернюк палан, чик кӧбератэк, пиналъёс шоры учкылытэк, лымыез зынъяса, ӟичы бызьылэ. Оло луд кечлэсь, оло шырлэсь пытьыоссэ чакла. Быжыз пуштрес, бадӟым, мугорын ӟичы огшоры пунылэсь пичигес.

‒ Учке ай, со асьмелэсь чик уг курда! ‒ вера одӥгез пияш.

‒ Тодэ, дыр, асьмеос сое кутыны ум быгатэ шуыса, ‒ валэктэ мукетыз.

‒ Пунымы ке сьӧрамы луысал, ‒ будэтэ куинетӥез, ‒ солэсь вужерзэ гинэ адӟысалмы.

Пиналъёс ӟичы сярысь оломар но веразы на. Огез шуэ, одӥг пӧйшур но, пе, ӟичы кадь визьмо ӧвӧл. Мукетыз вера, со, пе, адями кылэз вала. Валентин тодаз ваиз, ӟичылэн куэз, пе, дуно. Ӝужыт мугоро Лади (сое Телеграф юбо шуыса исало) ӟичыез тышкаськиз: со, пе, курегъёсыз но атасъёсыз лушка. Ванюш ушъяз кескич пӧйшурез: со, пе, шыръёсты быдтэ, ӧзьыен, туж пайдаё. Гурезе чузъяськымон чангето пиналъёс. Нош ӟичы пала учкизы но ‒ со интыяз ӧй вал ини. Куакъёс сьӧры ватскем.


ГОНДЫР

Огпол Коляос доры песянаезлэн эшез Лиза апай пыриз. Сое Гондыргурт кенак но шуо. Коля солэсь юалляськыны кутскиз:

‒ Лиза апай, тӥ Гондыргуртын-а вордӥськемын?

‒ Гондыргуртын, Коли.

‒ Нош малы сое Гондыргурт шуиллям? Со палан гондыръёс-а уло?

‒ Азьло гондыръёс котькытын трос вал.

‒ Нош кытчы соос кариськизы? Али соос ӧвӧл ни ук!

‒ Нюлэсъёс уно дыръя гондыръёс но трос вал.

‒ Гондыръёс нюлэскын гинэ уло-а?

‒ Отын, пие. Соослэсь гуоссэс нюлэскысь гинэ адӟылод.

‒ Нош малы гондыръёс тужгес чечыез но сезьыез ярато? Таӵе сиён нюлэскын ӧвӧл ук.

‒ Ма, соос уйёсы муш умортоос доры но сезьы бусыосы вуыло.

‒ Эмезез но, пе, соос сиё.

‒ Ӧзьы, ӧзьы, эмезяны но соос усточиос.

‒ Нош кин кужмогес, адям-а, гондыр-а? ‒ вераськонзэ азьланьтэ пияш.

‒ Гондыр кужмогес, нош адями визьмогес. Тани, шуом, со ворме валэз но, скалэз но, ӧзьы ке но, адями гондырлэсь уг кышка, сое асьме интыосысь улляз яке быдтӥз.

‒ Пыӵалэн ыбылыса быдтӥз-а?

‒ Ыбылыса но быдтӥз, нюлэсэз кораса, улон интызэ но воштытӥз.

‒ Мынам гондыръёсты телевизор пыр но киноысь гинэ адӟеме вань. Соос сярысь книгаос но уно гожтэмын. Мон троссэ лыдӟи ини. Нош мынам вань пильыслэсь вурем гондыре но. Учке ай: кыӵе со бадӟым но мусо!


КИОН

Азьло кионъёс уно вал шуыса, Колялы песянаез трос пол вералляз ини. Соос, пе, туж сьӧсесь, пудо-животэз тросэн-тросэн быдто вал. Нош али кионъёс сярысь шер-шер гинэ кылӥське. Гужем соос асьсэзыз лачмыт вӧзё, нош толалтэ, сиёнзы быремен, чылкак изьвермо. Соку пӧйшурасьёс пуныосын кионъёсты утчаны мыно. Кионлэн куэз дуно сылэ. Солэсь изьы вуро. Васька агайлэн изьыез, кылсярысь, кион кулэсь.

Колялэн кионэз мультфильмъёсысь гинэ адӟемез вань. Отын кион туж тунсыко вӧзьматэмын: луд кеч сьӧры уйылӥське но кутэмез уг луы. Кузь пель сое пӧяса кельтэ.


ЛУДКЕЧ

Колялэн атаез улмопуослэсь модосъёссэс кыз вайёсын бинялляса думылэ, Коля юатэк ӧз чида:

‒ Дядяй, малы тон ӧзьы кариськод?

‒ Лудкечъёс толалтэ улмопуэз медам йыръе шуыса.

‒ Нош кырын будӥсь куакъёсты соос уг ярато шат?

‒Улмопулэн сулэз соослы ческытгес потэ, луӧз. Асьмеос солэсь емышсэ яратӥськомы, нош кузь пельёс ‒ сулзэ.

‒ Кызьы, кызьы ‒ кузь пельёс? Лудкечъёсыз-а ӧзьы шуиськод?

‒ О-о. Пельёссы укыр кузесь уга, быжзы вакчи.

‒ Соослэн пельзы туж сак, дыр, ‒ валатске Коля.

‒ Пельёссы но сак, пыдъёссы но шаплы. Гужем соос пурысь дукесэн ветло, тол вуэ ке, тӧдьы шуба дӥсяло.

‒ Сое туж кышкась шуо, зэм-а со?

‒ Ӧз ке кышкасал, сое тушмонъёсыз кемалась быдтысалзы ини. Кион но, ӟичы но сое кутыны тыршо, пӧйшурасьёс но пыӵалэн, пуныен ветло, уйсы но сое утчаса лоба, куака гинэ но пинал лудкечпиосты сиыны дась.

‒ Мынам огпол но лудкечъёсты адӟеме ӧвӧл, нош пытьыоссы толалтэ корка котырамы уно луо.

‒ Нуназе куазен соос гуртлэсь палэнтӥсько, пуныослэсь но адямиослэсь кышкало, сад котыре уин гинэ вуо.

‒ Нош Лусьтромы шӧдэ-а соосты? ‒Колялэн юанъёсызлэн пумыз-йылыз ӧвӧл кадь.

‒ Уг шӧды, луӧз. Лудкечъёс шыпыт ветло, куаразэс поттылытэк.


ӴУШЪЯЛ

Коляос доры быдэс урамысь пиналъёс люкаськизы. Ӵушъялэз адӟыны лыктӥллям. Тӥляд юамды потӧз, кытысь Коля ӵушъялэз шедьтӥз шуыса. Васьлей агай сое нюлэскысь ваем. Одӥг нуналлы гинэ. Собере шедьтэм интыяз ик, пе, нуо. Нош маин ӵушъялэз сюдоно? «Со котьмае сие, ‒ валэктэм агаез, ‒ нымы-кибыосты, нумыръёсты, бубылиосты, небыт емышез. Шыръёсты но кутылыса сие».

Пиналъёс, ӵушъял шоры учкыса, куакапиос кадь чангето.

‒ Учкы ай, учкы, кӧня солэн йылсо веньёсыз!

‒ Киын маялляны уг яра, со шӧдтэк шорысь пештырске но туж вӧсь карымон бышкалтэ.

‒ Коля, ойдо сое Лусьтродылы вӧзьматом!

‒ Нош писэйды кышказ-а ӵушъяллэсь?

‒ Нырыз кыӵе, уть ай, зынъяське.

‒Со асьмелэсь чик но уг кышка, лэся?

‒Малы со кышкалӧз сыӵе веньёсын!

‒Ой, кутэ сое, кутэ, тани пушнеръёс пӧлы пегӟӧз!

‒ Нош пушнер ӵушка меда сое? Олле учкоме!

‒Тонэ со интые пушнерано! Кызьы уз пушнераськы, со улэп ӧвӧл шат?

‒ Ыжъёс пушнерлэсь уг кышкало ук!

‒ Со ыж, нош таиз ӵушъял. Ӵушъяллэн куэз векчигес.

‒ Мынам но ӵушъялэз дорам вӧземе потэ!

‒Эй, ӵушъял, чаль ай мон доры, мон тыныд нумыр ваи. Me!

‒ Кулэ солы тынад нумыръёсыд! Со йӧлэз яратэ!

‒ Учке ай, учке, кыӵе вожомыса нумыръёсты лоскатэ! Кытысь со нюлэскын йӧл шедьтӧз?..

Жытазе Марпапай ӵушъялэз коргидэ интыяз, солы йӧл сётӥз, нош Коля быдэс банка нумыр бичаз.

‒ Песянай, коргидын туж пеймыт ук, кызьы ӵушъял сиёнэз шедьтоз?

‒ Нырыныз умой шӧдэ сое. Соин ик ӵушъялъёс нуназе ялкаро, нош уин нюлэстӥ чаштыр гинэ бызьыло.

‒ Нош толалтэ мар сиё соос?

‒ Толалтэез соос изьыса ортчыто. Соин ик сӥзьыл, пичи гу лэсьтыса, отчы куасьмем куаръёслэсь небыт валес вале.

‒ Отын собере быдэс толэз кӧло-а? ‒ валатскиз Коля.

Васьлей агай, одӥг нунал ортчыса, ӵушъялэз берен тэле нуиз.


ШЫР

Огпол Машка писэймы корка пушкы ымаз шырен пыриз. Соиз кулэмын ӧвӧл на, саньырамын гинэ. Тани Машка шырзэ выж вылэ понӥз. Шыр соку ик интыысьтыз вырзыны 6з дӥсьты, чус кыл-лиз, собере жутскиз но ӧдъяз ук пегзыны. Нош писэй тае гинэ вӧзьмаса улэм, лэся. Шыр кык-куинь вамыш лэсьтыса вуиз-а, ӧз-а, писэй сое вене пыдъёсыныз ӝабырак кырмиз.

‒ Песянай, ма, шырлы туж вӧсь луэ, дыр, ук? Ойдо солы юрттом! Машка! Вӧзьыттэм! Али ик лэзь шырез! ‒ тышкаське со писэйзэс.

‒ Уг яра ӧзьы, Коли, ‒ алэ сое Марпапай, ‒ писэйёслэн сямзы сыӵе. Шырез сиемзы азьын, одно ик соин шудо. Шыръёс мыным но жаль пото, нош соос уно ке луысалзы, асьмелы ваньмызлы ик бадӟым изъян лэсьтысалзы.

‒ Маин?

‒ Маин ӧвӧл ‒ кызьы? ‒ Марпапай тупатэ Коляез. ‒ Шыръёс ю-нянез быдто, сое арам каро.

‒ Шыр туж пичи ук. Трос-а солы сиён кулэ?

‒ Шыръёслы маза сётӥд ке, соос вакчи дыр куспын аляктымон вӧлдӥськозы. Ярам коть, писэйёс вань, соос асьмелы изъянтӥсьёсын нюръяськыны юртто.


МУДӤСЬНЫР

Вӧзь вылын муч кадесь музъем люкъёс вань. Кинлэн ужез со? Марпапай Колялы валэктӥз: мудӥсьнырлэн, пе.

‒ Нош малы мудӥсьныр музъемез гудэ? ‒ юа Коля.

‒ Сюйысь со нымы-кибыосты но нумыръёсты утча.

‒ Нош мар со каре соосын? Сие шат?

‒ Озьы. Векчи лулосъёсын со кӧтсэ тыре.

‒ Нош мон мудӥсьныр сярысь выжыкыл тодӥсько!

‒ Кыӵе выжыкыл?

‒ Ма, Дюймовочка сярысь. Кызьы шыр Дюймовочкаен мудӥсьныр доры куное ветлӥзы. Песянай, нош малы со выжыкылын мудӥсьныр синтэм вӧзьматэмын? Со зэмзэ но уг адӟы шат?

‒ Соослэн вань улонзы пеймыт гутёын ортче, соин ик синъёссы уг адзо. Со понна мудӥсьныръёс зынъёсыз туж умой шӧдо. Пельёссы но сакесь. Тани али соос кемалась шодӥзы ини асьмелэсь татын сылэммес, табере кошкеммес вӧзьмаса уло.

‒ Песянай, ‒ шыпыт куараен юа Коля, ‒ ойдо мукет дыръя сьӧрамы лопата ваём но огзэ ке но музъемысь поттомы, мынам соосты адӟеме потэ.

‒ Соосты, пие, асьмеос кутыны ум быгатэ, гутёоссы укыр мудронэсь, йылзэс-пумзэс ноку но уд шедьты.


КОМАК

Валентинлэн синкабакъёсыз паськытамын, сокем керӟегъяське со.

‒Толон уин куинь чипыосмес комакъёс нуиллям, ‒ ивортэ со Колялы.

‒ Кытысь тодӥськод, комакъёс шуыса. Чипыостэс, оло, ӟичы яке лудмем писэй лушказ?

‒ Ӧвӧл, мон зэм верасько ‒ комакъёс. Дядяе ӧз пӧя ук.

‒ Тон комакез адӟид-а?

‒ Писэймы комакъёсын жугиськем. Соос пельёссэ но куртчиллям.

‒ Нош со комакъёсты вормем-а? ‒ Колялэн но мылкыдыз Валентинлэн кадь дыаны ӧдъяз.

‒ Комакъёс уно вылӥллям. Соос писэйлэсь ӧжыт пичигес ке но, туж кужмоесь. Писэймы огзэ ваньмытэм. Шӧйзэ дядяе Сапарайнюке сэрпалтӥз.

‒ Мынам комакез адӟеме ӧвӧл, ‒ шуиз Коля.

‒ Мынам но. Дядяелэн верамезъя, соос туж шаплы будо, лыдзы но ӝог йылэ.


МУВЫР БАКА

Та лулослэн вылтусыз кӧшкемыт но юрӟым. Синъёсыз былькак тон шоры учко. Куэз музъем тусо, пурысь, азь пыдъёсыз зӧкесь, беръёсыз сярысь вакчигес, тыбыраз но, пыдъёсаз но, йыраз но лыдъяны луонтэм зыръёс алямын.

Тросэз мувыр бакаез быдтыны туртто. Та лулослэн нокыӵе пайдаез ӧвӧл кожало, лэся. Нош Коля умой тодэ мувыр бакалэсь кулэлыксэ. Солы со сярысь песянаез вераз. Нуназе мувыр бака ватскыса улэ изъёс яке коръёс вискын. Сое шедьтыны луоз мурӝолысь яке пулъёс улысь. Мувыр бака угось салкым но пеймыт интыосты яратэ. Ӝытазе потэ нымы-кибыосты утчаны. Солэн яратоно интыез ‒ бакчаос но садъёс. Татын бака урод нымы-кибыосты быдтэ, чонариосты но гольык куаля-люльыосты сие. Озьы со адямилы бадӟым пайда вае.

Та сярысь Коля гинэ ӧвӧл, вань пиналъёс мед тодозы вылэм.


КЕНӞАЛИ

Коляослэн бакча беразы будо пӧртэм писпуос но куакъёс. Инты кельтэмын турын-куарлы но. Отын али горд клевер будэ. Клеверлэн сяська ӟускиосыз вылысь адӟыны луэ пӧртэм бубылиосты. мушъёсты но мукет лобась лулосъёсты. Тани Коля сяська вылысь майсыез синйылтӥз, сое матысенгес адӟемез потӥз. Клевер йыр пала кӧня ке вамыш лэсьтыса гинэ вуиз но ‒ олокытысь пичи сюрес вылэ вож кенӟали потӥз. Со солань-талань котыр учке, вань выросъёсыныз дыртэмзэ возьматэ. Коля шокамысь ик дугдӥз ‒ сыӵе тунсыко потӥз ӧтьымтэ-возьмамтэ «куно». Кенӟали пичигес йыро, синъёсыз кенэм быдӟа гинэ, шунды шорын соос чильк-вальк чиляло, нош быжыз олома кузьда, мугорыз сьӧры музъем вылтӥ нюж кыстӥське. «Кенӟалиос. пыдын пачкатыку, быжзэс чигыса, пе, кельто, ‒ малпаське Коля, ‒ тани мон сое кышкато ай!» Нош малпанзэ быдэстыны ӧз кылды ‒ кенӟали, та шуытозь, лыз бурдо векчи бубылиез кутӥз но ӝогак сииз. «Уть тон кыӵе шаплы!» ‒ ас понназ ушъяз Коля кенӟалиез. Нош соиз зӥрак берытскиз но, быжзэ кужмысь мукет пала сэрпалтыса, турын пушкы ышиз. Коля сьӧраз уиськиз вал но, шедьтод на шат кенӟалиез вож будосъёс пӧлысь?


КОЙЫК

Колялэн атаезлы кузьмаллям ваё-ваё сюр.

‒ Койык сюр та, ‒ пиезлы валэктӥз но сюрзэ корка ӧс вадьсы кортӵоген юнматӥз. Вайёсаз, пе, изьы но картуз ошылом.

Колялы туж тунсыко потэ: кин меда та быдӟа сюрлэн кузёез, туж бадӟым мугоро, дыр, со?

‒ Та, ‒ ош койыклэн сюрез. Сое со тулыс пал куштэ, интыяз выльыз будэ. Койыкъёс уло нюлэсъёсын. Соослэн яратоно сиёнзы ‒ пӧртэм куакъёс но вож писпуос, губи но гажаса сиё.

‒ Койык кин быдӟа?

‒ Вал быдӟа.

‒ Вал кадь ик кужмо-а?

‒ О-о!.. Огпол ӵыжыса, кионэз ваньмытэ!