Логотип БилингваБилингваУдмуртский центр билингвизма

Телефон: (8 3412) 687-798

E-mail: udmbilingva@yandex.ru
Контактная информация

Литературные загадки Алексея Алексеевича Ельцова

Источник: *Ельцов А.А. Кенгуру уг си гуры: Нылпиослы кылбуръёс, мадиськонъёс, поэма-выжыкыл. ‒ Ижевск: Удмуртия, 2002. ‒ С. 30-32.


МАДИСЬКОНЪЁС

Дугдэ,

Выльысь азьлань ширтэ,

Быдэс гуртэз

Дораз пыртэ.

Небыт питран вылын

Сылэ ‒

Чугун сюрес

Ӧвӧл кулэ.

Возиськыса

Езтыл борды

Ворттылытэ ни

Милемды.

Поромыса

Нунал ӵоже,

Уй пал гинэ

Дораз коже.

Map йыртӥян со ‒

Ребус,

Я кин тодӥз?..

             *(Троллейбус)*

Вазь тулыс

Ӵуж чипыос

Возь выл тыр

Пазьгиськизы.

Бурд потӥз гинэ ‒

Соос

Инбамозь ик

Ӝутскизы.

          * (Унябей)*

Сюръёсыз солэн

Вӧл-вӧл,

Но чырткем пужей

Ӧвӧл.

Корт сапег

Ӝог пыдъёсаз,

Тыл пиштэ

Юн кымысаз.

Ветлэ

Андан сюрестӥ,

Ортчылэ

Корка вӧзтӥм.

Я, пичие,

Тодад вай.

Нимало сое...

             * (Трамвай)*

Бурдъёссэ

Паськыт вӧлъя,

Лыз инмын

Лоба-поръя.

Вылэтӥ ке но

Лоба,

Иськемысь

Шырез тодма.

Синъёсыз солэн

Туж сэзь,

Гижыос ‒

Туж лэчытэсь.

Гурезьысь

Огпол адӟи,

Нимало сое...

           *(Ӧрӟи)*

Синъёссэ

Кыне,

Усьтэ,

Ас кожаз

Каре тэтэ.

Йырсиез

Чилясь мертчан,

Вылтыраз ‒

Дӥсян-кутчан.

Куддыръя

Вераськылэ,

Куддыръя нош

Бӧрдылэ.

Тон шонер тодӥд,

Данё,

Нимало сое...

            * (Мунё)*

Тӧдьы шур

Чурен бызе,

Ведраын

Шукы пӧзе.

Анаймы

Пыртоз доре,

Пуксёмы

Ӝӧк котыре.

Кин нянен,

Нош кин

Няньтэк,

Ӝӧк сьӧрын

Ум пуке

Тэк.

Ческытэз

Солэсь

Ӧвӧл.

Тодӥды,

Шонер!

Со ...

   * (Йӧл)*

Гордалэс-ӵуж кунянэн

Шудӥськом быдэс нунал.

Анайзэ уин ‒ нонэ,

Кӧлыны уг сёт ӵукна.

                * (Шунды но солэн сиосыз)*

Туп выллем бинялскыса

Погыля каллен, ӝуштэ.

Нош кин ке сое иса ‒

Со ачиз берло бӧрдэ.

                                  *(Ӵушъял)*

Букваос но со бича,

Киноос но адӟытэ,

Суреда, вера, кырӟа,

Юаськод ‒ ваньзэ тодэ.

                                   * (Компьютер)*.